ବୌଦ୍ଧ ଜିଲାରେ ବେଆଇନ ବନ୍ଧୁକ କାରାଖାନା
ସୋନପୁର ପୋଲିସର ଚଢ଼ଉ, ବୌଦ୍ଧ ପୋଲିସ ନିଦ୍ରାରେ
ବୌଦ୍ଧ – ବୌଦ୍ଧ ଜିଲା ହରଭଂଗା ବ୍ଳକର କୁଶଙ୍ଗ ଗ୍ରାମରେ ଦିର୍ଘ ଦିନ ଧରି ଚାଲିଥିବା ଏକ ବେଆଇନ ବନ୍ଧୁକ କାରାଖାନା ଉପରେ ସୋନପୁର ଜିଲା ପୋଲିସ ଚଢ଼ଉ କରି ୨ ଜଣଙ୍କୁ ଗିରଫ କରିଥିବା ଘଟଣା ନିଦ୍ରାରେ ରହିଥିବା ବୌଦ୍ଧ ପୋଲିସର ନିଦ ହଜାଇ ଦେଇଛି । ବୌଦ୍ଧ ସହର ଏବଂ କୁଶଙ୍ଗ ଗ୍ରାମର କେତେକ ବ୍ୟକ୍ତି ଦିର୍ଘଦିନ ଧରି କୁଶଙ୍ଗ ଗ୍ରାମରେ ଏକ ବେଆଇନ ବନ୍ଧୁକ କାରାଖାନା ଚଳାଇବା ସହିତ ବିଭିନ୍ନ ଅଂଚଳକୁ ଚାଲାଣ କରୁଥିଲେ । କିଛିଦିନ ତଳେ ସୋନପୁର ପୋଲିସ ବୌଦ୍ଧ ସହରର ନିର୍ମଳ ଯୋଶୀଙ୍କୁ ବନ୍ଧୁକ ଚାଲାଣ କରୁଥିବା ସମୟରେ ସୋନପୁର ନିକଟସ୍ଥ ତେଲନଦୀ ପୋଲ ଉପରେ ଗିରଫ କରିଥିଲେ । ପରେ ଏନେଇ ତଦନ୍ତ କରିବା ସହ ବୌଦ୍ଧ ଜିଲା ହରଭଂଗା ଥାନା ଅନ୍ତର୍ଗତ କୁଶଙ୍ଗ ଗ୍ରାମରେ ଚଢ଼ଉ କରି ରମେଶ ବେହେରା (୭୬)ଙ୍କୁ ଗିରଫ କରିଛନ୍ତି ।
ଚଢ଼ଉ ସମୟରେ ୩ଟି ଦେଶୀ ପିସ୍ତଲ, ୨ଟି ଦେଶୀ ବନ୍ଧୁକ ଏବଂ ବନ୍ଧୁକ ତିଆରି ସରଞ୍ଜାମ ପୋଲିସ ଜବତ କରିଅଛି । ଦିର୍ଘଦିନ ଧରି ହରଭଂଗା ପୋଲିସର ନାକ ତଳେ ବେଆଇନ କାରାଖାନା ଚାଲିଥିବାବେଳେ କିପରି ପୋଲିସ ପାଖରେ କିଛି ତଥ୍ୟ ନଥିଲା ସେନେଇ ସାଧାରଣରେ ପ୍ରଶ୍ନ ଉଠୁଛି ।
