ସମ୍ପର୍କୀୟା ନାତୁଣୀକୁ ଅସଦାଚରଣ କରି ଯୁବକ ଗିରଫ
ନିମାପଡ଼ା, ୨୧ ଅକ୍ଟୋବର – ନିମାପଡା ବ୍ଲକ ଅନ୍ତର୍ଗତ ବଳଙ୍ଗା ଅଂଚଳର ଜଣେ ନାବାଳିକା କଲେଜ ଛାତ୍ରୀକୁ ତାର ସମ୍ପର୍କୀୟ ଅସଦାଚରଣ କରିଥିବା ଅଭିଯୋଗରେ ଆଜି ଜେଲ ଯିବା ସାଧାରଣରେ ଚର୍ଚ୍ଚାର ବିଷୟ ହୋଇଛି । ଘଟଣାରୁ ପ୍ରକାଶ ଯେ ଆଜି ପୁର୍ବାହ୍ନରେ ବଳଙ୍ଗା ଥାନା ଅନ୍ତର୍ଗତ ପିପଳିଆ ଗ୍ରାମର ସୁରେନ୍ଦ୍ର କୁମାର ସ୍ୱାଇଁ (୪୦)ନାମକ ଜଣେ ଯୁବକ ଗ୍ରାମ ମୁଣ୍ଡରେ ଗାଇ ଚରାଉଥିଲେ । ସେହି ସମୟରେ ପାଖ ଗ୍ରାମର ଜଣେ ନାବାଳିକା କଲେଜ ଛାତ୍ରୀ (ମୀନା ) ଛଦ୍ମନାମ ଉକ୍ତ ରାସ୍ତାଦେଇ ନିକଟସ୍ଥ ଏକ ବଜାରକୁ ଯାଉଥିଲା । ତେବେ ମୀନା ସୁରେନ୍ଦ୍ରଙ୍କ ସମ୍ପର୍କୀୟ ନାତୁଣୀ ହୋଇଥିବାରୁ ସୁରେନ୍ଦ୍ର ମୀନାକୁ ଏକୁଟିଆ ଦେଖି ତାକୁ ଅଶ୍ଳୀଳ କମେଂଟ ମାରିବା ସହିତ ଅସଦାଚରଣ କରିଥିଲେ । ତେବେ ମୀନା ସେଠାରୁ କୌଶଳ କ୍ରମେ ଖସିଆସି ପରିବାର ଲୋକଙ୍କୁ ଜଣାଇଥିଲେ ।
ଏନେଇ ନାବାଳିକା ପରିବାର ପକ୍ଷରୁ ବଳଙ୍ଗା ଥାନାରେ ଲିଖିତ ଅଭିଯୋଗ କରାଯିବା ପରେ ବଳଙ୍ଗା ପୁଲିସ ଅଭିଯୁକ୍ତ ସୁରେନ୍ଦ୍ରଙ୍କୁ ଗିରଫ କରି ତା ବିରୁଦ୍ଧରେ ପୋସ୍କୋ ଆକ୍ଟରେ ମାମଲା ରୁଜୁ କରି ତଦନ୍ତ ଜାରିରଖିଛି ।
