ବଡ ଭାଇର କାଠ ଫାଳିଆ ମାଡ଼ରେ ସାନ ଭାଇର ମୃତ୍ୟୁ
ସମ୍ବଲପୁର, ୧୯ ଅପ୍ରେଲ – ବଡ ଭାଇର କାଠ ଫାଳିଆ ମାଡ଼ରେ ସାନ ଭାଇର ମୃତ୍ୟୁ ଘଟିଥିବା ଅଭିଯୋଗ ହୋଇଛି । ଏଭଳି ଏକ ଦୁଃଖଦ ଘଟଣା ଘଟିଯାଇଛି ସମ୍ବଲପୁର ଜିଲ୍ଲା ମହୁଲପାଲି ଥାନା ଅନ୍ତର୍ଗତ କୁରୁମିମୁଣ୍ଡା ଗ୍ରାମରେ । ମୃତକଙ୍କ ନାମ ପ୍ରଦୀପ ବାଗ୍ ବୋଲି ଜଣାପଡିଛି ।
ଘଟଣାରୁ ପ୍ରକାଶ ଯେ, ଘରଡ଼ିହ ଭାଗବଂଟାକୁ କେନ୍ଦ୍ର କରି ଗତ ରାତିରେ ପ୍ରଦୀପ ଏବଂ ତାଙ୍କ ବଡ ଭାଇ ସର୍ଦାର ବାଗ୍ ଙ୍କ ମଧ୍ୟରେ ପ୍ରଥମେ ବଚସା ହୋଇଥିଲା । ପରେ ଏହା ଉଗ୍ର ରୂପ ନେଇଥିଲା । ସର୍ଦାର ହଠାତ୍ ଉତକ୍ଷିପ୍ତ ହୋଇ ଏକ କାଠ ଫାଳିଆରେ ପ୍ରଦୀପଙ୍କୁ ଆକ୍ରମଣ କରିଥିଲେ । ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା । ଏପରିକି ସର୍ଦାରଙ୍କ ଆକ୍ରମଣରେ ତାଙ୍କ ଭାଇବୋହୂ ଅର୍ଥାତ୍ ପ୍ରଦୀପଙ୍କ ପତ୍ନୀ ମଧ୍ୟ ଆହତ ହୋଇଛନ୍ତି । ମହୁଲପାଲି ଥାନାରେ ଏନେଇ ଲିଖିତ ଅଭିଯୋଗ ଦାଏର୍ କରାଯାଇଛି । ଅଭିଯୋଗକୁ ଭିତି କରି ପୋଲିସ ଅଭିଯୁକ୍ତ ସର୍ଦାର ବାଗ୍ କୁ ଅଟକ ରଖିବା ସହ ଏନେଇ ଅଧିକ ତଦନ୍ତ ଚଳାଇଛି ।
