ଅଖାରେ ବନ୍ଧା ଅବସ୍ଥାରେ ନର୍ସଙ୍କ ମୃତଦେହ ଉଦ୍ଧାର
ପରିବାର ଲୋକଙ୍କ ଅଭିଯୋଗ ପ୍ରେମିକ ହିଁ ହତ୍ୟାକାରୀ
ଜଗତସିଂହପୁର, ୧୭ ସେପ୍ଟେମ୍ବର – ଜଗତସିଂହପୁର ଜିଲ୍ଲା ବିରିଡ଼ି ଥାନା ଅନ୍ତର୍ଗତ ବିଲୁଆଖାଇ ନଦୀ ପଠାର ଦୋଗଛିଆ ନୂଆପାରି ନିକଟରୁ ଏକ ଅଖାରେ ବନ୍ଧା ହୋଇଥିବା ଅବସ୍ଥାରେ ଜଣେ ଯୁବତୀଙ୍କ ମୃତଦେହକୁ ଆଜି ପୋଲିସ ଉଦ୍ଧାର କରିଛି । ଶବ ଚିହ୍ନଟ ପ୍ରକ୍ରିୟାରୁ ଜଣାପଡିଛି ଯେ, ତାଙ୍କ ନାମ ନିହାରିକା ପାତ୍ର ।
ନିହାରିକାଙ୍କ ଘର ଭୁବନେଶ୍ୱର ବାଲିପାଟଣା ଥାନା ଅନ୍ତର୍ଗତ ଭିଙ୍ଗାରପୁର ଗ୍ରାମରେ । ସେ ପେଷାରେ ଜଣେ ନର୍ସ । ନିହାରିକା କଟକର ଏକ ନର୍ସିିଂହୋମ୍ ରେ ନର୍ସ ଭାବେ କାର୍ଯ୍ୟରତ ଥିଲେ । ସେ ଗତ କିଛି ଦିନ ହେଲା ନିଖୋଜ ଥିଲେ । ପରିବାର ଲୋକେ ଚାରିଆଡେ ଖୋଜାଖୋଜି କରିଥିଲେ ସୁଦ୍ଧା ତାଙ୍କର କୌଣସି ଖୋଜ ଖବର ପାଇନଥିଲେ । ଶେଷରେ ଚାରିଆଡୁ ନିରାଶ ହୋଇ ଗତ ୯ ତାରିଖ ଦିନ ଝିଅ ନିଖୋଜ ନେଇ କଟକ ମଧୁପାଟଣା ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗକୁ ଭିତି କରି ପୋଲିସ ଏ ସଂକ୍ରାନ୍ତରେ ଏକ ମାମଲା ରୁଜ୍ଜୁ କରିବା ସହ ଘଟଣାର ତଦନ୍ତ ଜାରୀ ରଖିଥିଲା । ତେବେ ଆଜି ବିଲୁଆଖାଇ ନଦୀ ପଠାର ଦୋଗଛିଆ ନୂଆପାରି ନିକଟରୁ ଏକ ଅଖାରେ ବନ୍ଧା ହୋଇଥିବା ଅବସ୍ଥାରେ ତାଙ୍କ ମୃତଦେହକୁ ବିରିଡ଼ି ପୋଲିସ ଉଦ୍ଧାର କରିଥିଲା । ଏନେଇ ମଧୁପାଟଣା ଥାନାକୁ ଖବର ଦିଆଯାଇଥିଲା । ପୋଲିସ ନିହାରିକାଙ୍କ ପରିବାର ଲୋକଙ୍କ ସହିତ ଯୋଗାଯୋଗ କରିଥିଲା । ନିହାରିକାଙ୍କ ମାଆ, ଭଉଣୀ ଓ ଭିଣୋଇ ବିରିଡ଼ି ଥାନାରେ ପହଂଚି ଡ୍ରେସ୍ ରୁ ତାହା ନିହାରିକାଙ୍କ ମୃତଦେହ ବୋଲି ଚିହ୍ନି ଥିଲେ ।
ନିହାରିକାଙ୍କୁ ତାଙ୍କ ପ୍ରେମିକ ହତ୍ୟା କରିଥିବା ପରିବାର ଲୋକେ ଅଭିଯୋଗ କରିଛନ୍ତି । ମାତ୍ର, କିଏ ସେହି ପ୍ରେମିକ ତାହା ଜଣାପଡିନାହିଁ । ପୋଲିସ ସାଇଂଟିଫିକ୍ ଟିମ୍ ସହିତ ଘଟଣାସ୍ଥଳରେ ପହଂଚି ଛାନଭିନ୍ ଚଳାଇଛି । ମଧୁପାଟଣା ପୋଲିସ ପକ୍ଷରୁ ଏନେଇ ଅଧିକ ତଦନ୍ତ ଜାରୀ ରହିଛି ।
