ଚାରି ନକଲି ସାମ୍ବାଦିକ ଗିରଫ
ଗଞ୍ଜାମ, ୦୧ ଅଗଷ୍ଟ – ଆଜି ସଦର ଥାନା ପୁଲିସ ୪ଜଣ ନକଲି ସାମ୍ବାଦିକଙ୍କୁ ଗିରଫ କରି କୋର୍ଟ ଚାଲାଣ କରିଛି । ନକଲି ଗିରଫ ସାମ୍ବାଦିକମାନେ ହେଲେ ତପନ କୁମାର ପଟ୍ଟନାୟକ, ସୁନୀଲ ପାଢ଼ୀ, ଦୀପକ ବାଡ଼ତ୍ୟା, ଡି. ନାଗେଶ୍ୱର ରାଓ । ସେମାନଙ୍କ ଠାରୁ କ୍ୟାମେରା ବୁମ୍, ଦାମୀ କାର୍ ଓ ନକଲି ପରିଚୟପତ୍ର ଜବତ କରାଯାଇଛି ବୋଲି ଭବାନନ୍ଦ ପ୍ରଧାନ ସୂଚନା ଦେଇଛନ୍ତି । ଏମାନେ ଏମବିସିର ପ୍ରତିନିଧି ବୋଲି ପରିଚୟ ଦେଇଥିଲେ ।
ଘଟଣାରୁ ପ୍ରକାଶ ଏହି ଚାରିଜଣ ଅପରାହ୍ନ ୧ ଘଟିକା ସମୟରେ ବାଲିପଡ଼ା ସରସ୍ୱତୀ ଶିଶୁ ମନ୍ଦିରକୁ ଯାଇ ବୈଦ୍ୟୁତିକ ଗଣମାଧ୍ୟମ ସାମ୍ବାଦିକ ପରିଚୟ ଦେଇ ଟଙ୍କା ଆଦାୟ ଉଦ୍ୟମ କରିଥିଲେ । ଏ ସମ୍ପର୍କରେ ମୃତ୍ୟୁଞ୍ଜୟ ସାହୁ ନାମକ ଏମ.ବି.ସି.ର ସାମ୍ବାଦିକଙ୍କ ଅଭିଯୋଗ କ୍ରମେ ସଦର ଥାନା ପୁଲିସ ଏହି ଚାରିଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ଏ ସମ୍ପର୍କରେ ଥାନା କେଶ ନଂ. ୧୯୦/୧୯ରେ ଏକ ମାମଲା ରୁଜୁ ହୋଇଛି ବୋଲି ସଦର ଆଇଆଇସି ସୂଚନା ଦେଇଛନ୍ତି ।
