ଗୁଳିକାଣ୍ଡ ଘଟଣାରେ ୬ ଗିରଫ
ପୁରୀ, ୨ ଜୁଲାଇ – ସ୍ୱର୍ଗଦ୍ୱାର ମାଛ ମାର୍କେଟ୍ ନିକଟରେ ଘଟିଥିବା ଗୁଳିକାଣ୍ଡ ଘଟଣାରେ ସମୁଦ୍ରକୂଳ ଥାନା ପୋଲିସ ୬ ଜଣଙ୍କୁ ଗିରଫ କରିଛି । ସେମାନେ ହେଲେ ବଳିଆ ପଣ୍ଡା ଅଂଚଳର ବାବୁନି ଓରଫ ସୁରେନ୍ଦ୍ର ନାୟକ (୨୬), ମିଶ୍ର ସାହି ଜଗନ୍ନାଥ ବସ୍ତିର ମୁନା ଓରଫ ମନୋଜ ପଣ୍ଡା (୧୯), ତିଆଡ଼ି ସାହିର ରାଜା ଓରଫ ସତ୍ୟପ୍ରକାଶ ମଲ୍ଲିକ (୧୯), ମାର୍କଣ୍ଡେଶ୍ୱର ସାହି ନୂଆସାହିର ଟିକି ପୁଅ ଓରଫ ସୁଶାନ୍ତ ବେହେରା (୨୩), ଗୌଡ଼ବାଡ଼ ସାହିର ଜିତୁ ଓରଫ ଜିତେନ୍ଦ୍ର ପାତ୍ର (୨୯) ଓ ବ୍ରହ୍ମଗିରି ଥାନା ଅନ୍ତର୍ଗତ ଗୌଡ଼ସାହିର ବିଜୟ କୁମାର ଦେ (୩୫) ।
ଶନିବାର ସଂନ୍ଧ୍ୟାରେ ସ୍ୱର୍ଗଦ୍ୱାର ମାଛ ମାର୍କେଟ୍ ନିକଟରେ ରହୁଥିବା ବାବୁଲା ଓରଫ ସୁକାନ୍ତ ସାହୁଙ୍କୁ ରାଜା ଓ ବାବୁନି ଅତି ନିକଟରୁ ଗୁଳି କରିଥିଲେ । ଅନ୍ୟ ଅଭିଯୁକ୍ତ ମାନେ ଷଡ଼ଯନ୍ତ୍ର ରଚିଥିବା ପୋଲିସ ସୂତ୍ରରୁ ପ୍ରକାଶ । ଅନ୍ୟପକ୍ଷରେ ଘଟଣାରେ ଗୁରୁତର ବାବୁଲା ସମ୍ପ୍ରତି କଟକ ବଡ଼ ମେଡିକାଲରେ ଚିକିତ୍ସାଧିନ ଅଛନ୍ତି ।
