୨ ସ୍ତ୍ରୀଙ୍କୁ ହତ୍ୟା ପରେ ବୃଦ୍ଧଙ୍କ ଆତ୍ମହତ୍ୟା
ବାରିପଦା ,୨୨ମଇ – ନିଜର ଦୁଇ ପତ୍ନୀଙ୍କୁ ହତ୍ୟା କରିବା ପରେ ଜଣେ ବୃଦ୍ଧ ଗଛରେ ରଶି ଲଗାଇ ଆତ୍ମହତ୍ୟା କରିଛନ୍ତି । ଏଭଳି ଅଭାବନୀୟ ଘଟଣା ଘଟିଛି ମୟୂରଭଞ୍ଜ ଜିଲା ବାରିପଦା ସଦର ଥାନା ତଥା ବାରିପଦା ବ୍ଲକ ଅଧୀନ ଶଙ୍ଖାଭଙ୍ଗା ପଂଚାୟତ ତାଡ଼କିଶୋଳ ଗ୍ରାମରେ । ଖବର ପାଇ ବାରିପଦା ସଦର ଏସଡିପିଓ କେ.ପି. ପଟ୍ଟନାୟକ ଓ ସଦର ଥାନା ଅଧିକାରୀ ସ୍ୱର୍ଣ୍ଣଲତା ମିଞ୍ଜ ସନ୍ଧାନୀ କୁକୁର ଓ ସାଇଂଟିଫିକ ଟିମ ଧରି ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିଛନ୍ତି ।
ପ୍ରକାଶ ଯେ, ଉକ୍ତ ଗ୍ରାମର ଶ୍ୟାମ ମାର୍ଣ୍ଡି(୬୦) ଜଣେ ମାନସିକ ବିକୃତ ବ୍ୟକ୍ତି । ତାଙ୍କର ପ୍ରଥମ ସ୍ତ୍ରୀ ଫୁଲମଣି ଓ ଦ୍ୱିତୀୟ ସ୍ତ୍ରୀ ସାଲଲେଖା ମଙ୍ଗଳବାର ବିଳମ୍ବିତ ରାତିରେ ଭିନ୍ନ କୋଠରୀରେ ଶୋଇଥିବା ବେଳେ ଶ୍ୟାମ ଏକ ହାତୁଡିରେ ବାଡେଇ ଉଭୟଙ୍କୁ ହତ୍ୟା କରିଥିଲେ । ପରେ ଶ୍ୟାମ ଘର ସମ୍ମୁଖରେ ଥିବା ଏକ ଛୋଟ ଗଛରେ ରଶି ଲଗାଇ ଆତ୍ମହତ୍ୟା କରିଥିଲେ । ଏ ନେଇ ଶ୍ୟାମଙ୍କ ଶଳା ସୁନାରାମ ମୁର୍ମୁଙ୍କ ନିକଟରୁ ବୁଧବାର ସକାଳେ ଲିଖିତ ଅଭିଯୋଗ ହେବା ପରେ ବାରିପଦା ସଦର ଥାନାରେ କେସ୍ ନଂ. ୪୮/୧୯ରେ ମାମଲା ରୁଜୁ ହୋଇଛି । ପୁଲିସ ଘଟଣାସ୍ଥଳରେ ପହଂଚି ଶବ ଜବତ କରି ବ୍ୟବଚ୍ଛେଦ ନିମନ୍ତେ ବାରିପଦା ପିଆରଏମ୍ ସରକାରୀ ମେଡିକାଲ କଲେଜକୁ ପଠାଇଦେଇଛି । ଏଥି ସହିତ ଘଟଣା ଉପରେ ତଦନ୍ତ ଜାରି ରହିଛି ବୋଲି ଏସଡିପିଓ ଶ୍ରୀ ପଟ୍ଟନାୟକ ଗଣମାଧ୍ୟମକୁ ସୂଚନା ଦେଇଛନ୍ତି । ତେବେ ଏହି ଘଟଣା ଧର୍ମାନ୍ତରୀକରଣକୁ ନେଇ ଘଟିଥିବାର ସନ୍ଦେହ କରାଯାଉଛି । ଶ୍ୟାମ ପ୍ରାୟ ୩ ମାସ ପୂର୍ବେ ଖ୍ରୀଷ୍ଟିଆନ ଧର୍ମ ଗ୍ରହଣ କରିଥିବାର ଜଣାପଡିଛି ।
ତେବେ ଘଟଣାର ବିଭିନ୍ନ ଦିଗ ଉପରେ ତଦନ୍ତ ରହିଛି । ବ୍ୟବଚ୍ଛେଦ ରିପୋର୍ଟକୁ ଅପେକ୍ଷାଚରାଯାଇଛି ବୋଲି ଏସଡିପିଓ ଶ୍ରୀ ପଟ୍ଟନାୟକ କହିଛନ୍ତି ।
