୧୭୦ କେଜି ଗଞ୍ଜେଇ, ୨ କାର୍, ବାଇକ୍ ଜବତ : ୭ ଗିରଫ
ଜୟପୁର, ୪ ଜୁନ୍ – ଜୟପୁର ପୋଲିସ ଗଞ୍ଜେଇ ଚାଲାଣ କାରୀଙ୍କ ଉପରେ କଡ଼ା ନଜର ରଖିଛି । ଜୟପୁର ସଦର ପୋଲିସ, ବୈପାରିଗୁଡା ପୋଲିସ ଓ ବୋରିଗୁମ୍ମା ପୋଲିସ ପୃଥକ୍ ପୃଥକ୍ ୩ଟି ସ୍ଥାନରେ ଚଢ଼ଉ କରି୧୭୦ କେ.ଜି. ଗଞ୍ଜେଇ ଜବତ କରିଥିବା ବେଳେ ୨ଟି କାର୍ ଓ ଗୋଟିଏ ବାଇକ୍ ଜବତ କରିଛି । ୩ଟି ମାମଲାରେ ଉତର ପ୍ରଦେଶର ୭ ଜଣଙ୍କୁ ପୋଲିସ ଗିରଫ କରିଛି । ୨ଟି କାର୍ ଓ ଗୋଟିଏ ବାଇକ୍ ଯୋଗେ ମାଲକାନଗିରି ଠାରୁ ଉତର ପ୍ରଦେଶ ଗଞ୍ଜେଇ ଚାଲାଣ କରାଯାଉଥିବା ବେଳେ ପୋଲିସ ଚଢ଼ଉ କରିଥିବା ଏସଡିପିଓ ସାଗରିକା ନାଥ ଆଜି ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ପ୍ରକାଶ କରିଛନ୍ତି ।
ମାଲକାନଗିରିରୁ ହୁଣ୍ଡାଇ କାର୍ ନଂ ୟୁପି ୬୭ଡବ୍ଲୁ ୪୮୪୨ ଯୋଗେ ଗଞ୍ଜେଇ ଚାଲାଣ ହେଉଥିବା ବେଳେ ଜୟପୁର ସଦର ପୋଲିସ ପଣସପୁଟ ବାଗ୍ରା ଠାରେ ଚଢ଼ଉ କରି କାର୍ ସହ ୭୨ କେ.ଜି. ଗଞ୍ଜେଇ ଜବତ କରିଛି । ଏହି ମାମଲାରେ ପୋଲିସ ୩ ଜଣଙ୍କୁ ଗିରଫ କରିଛି । ଗିରଫ ଅଭିଯୁକ୍ତ ମାନେ ହେଲେ ବିରେନ୍ଦ୍ର ଯାଦବ (୨୧), ଗଣେଶ ସିଂ (୫୦), ସୁନିଲ କୁମାର ବେଶରୀ (୨୭) । ସେହିପରି ବୋରିଗୁମ୍ମା ପୋଲିସ ଜାତୀୟ ରାଜପଥ ନଂ ୨୬ର ଆଦର୍ଶ ବିଦ୍ୟାଳୟ ନିକଟରେ ନମ୍ବର ବିହିନ ବାଇକ୍ ରେ ଗଞ୍ଜେଇ ଚାଲାଣ ହେଉଥିବା ବେଳେ ଚଢ଼ଉ କରି ୨ ଜଣଙ୍କୁ ଗିରଫ କରିଛି । ଗିରଫ ଅଭିଯୁକ୍ତ ମାନେ ହେଲେ ମନୋଜ କୁମାର ସିଶୋଦିଆ (୩୫), ଆକବର ଖାନ (୩୮) । ସେମାନଙ୍କ ନିକଟରୁ ୪୦ କେ.ଜି. ଗଞ୍ଜେଇ ସହ ବାଇକ୍ ଜବତ ହୋଇଛି ।
ଅନୁରୂପ ଭାବେ ଅନ୍ୟ ଏକ ଘଟଣା କ୍ରମେ ବୈପାରିଗୁଡା ପୋଲିସ ଦୋରଗୁଡା ଠାରେ ଗଞ୍ଜେଇ ଚାଲାଣ ବେଳେ ଚଢ଼ଉ କରି କାର୍ ନଂ ୟୁପି୬୭ ଭି ୮୭୬୧ ସହ ୨ ଜଣଙ୍କୁ ଗିରଫ କରିଛି । ସେମାନେ ହେଲେ ସନ୍ତୋଷ ଯାଦବ (୨୮ ), ସତିଶ ସିଂ (୪୩) । ଏମାନଙ୍କ ନିକଟରୁ ପୋଲିସ ୫୮ କେ.ଜି. ଗଞ୍ଜେଇ ଜବତ କରିଛି । ୨ ଜଣ ଏହି ଘଟଣାରେ ଚମ୍ପଟ ମାରିଥିବା ପୋଲିସ ପ୍ରକାଶ କରିଛି ।
ଏହି ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ଟାଉନ ଥାନା ଅଧିକାରି ବାଲେଶ୍ୱର ଗିଧି, ସଦର ଥାନା ଅଧିକାରି ଧିରେନ୍ଦ୍ର ବେହେରା, ବୋରିଗୁମ୍ମା ଥାନା ଅଧିକାରି ସଞ୍ଜୟ କୁମାର ମଣ୍ଡଳ ପ୍ରମୁଖ ଉପସ୍ଥିତ ଥିଲେ ।
