ନୃତ୍ୟର ତାଳେ ତାଳେ ଷ୍ଟେଜ୍ ରେ ସୁରକ୍ଷା କର୍ମୀଙ୍କ ଫାଙ୍କା ଗୁଳି ଚାଳନା
ଭିଡ଼ିଓ ଭାଇରାଲ୍
ପୁରୀ , ୨୭ ସେପ୍ଟେମ୍ବର – ଷ୍ଟେଜ୍ ରେ ନୃତ୍ୟର ତାଳେ ତାଳେ ଫାଙ୍କା ଗୁଳି ଚାଳନା କରୁଛନ୍ତି ସୁରକ୍ଷା କର୍ମୀ । ଏଭଳି ଏକ ଭିଡ଼ିଓ ଏବେ ସୋସିଆଲ୍ ମିଡ଼ିଆରେ ଭାଇରାଲ୍ ହୋଇଛି । ଭିଡ଼ିଓଟି ଶ୍ରୀକ୍ଷେତ୍ର ପୁରୀର ଏବଂ ଅନୁଷ୍ଠିତ ଏକ ସାଂସ୍କୃତିକ କାର୍ଯ୍ୟକ୍ରମର ଏହା ମାତ୍ର ଏକ ଝଲକ୍ ବୋଲି ଜଣାପଡିଛି ।
ସୂଚନା ଅନୁଯାୟୀ, ଭିଡ଼ିଓରେ ନାରାୟଣ ସାହୁ ନାମକ ପୁରୀର ଜଣେ ଯୁବ ବ୍ୟବସାୟୀ ଷ୍ଟେଜ୍ ରେ ନାଚୁଥିବା ଦେଖିବାକୁ ମିଳିଛି । ତାଙ୍କ ସହିତ ନାଚିଲା ବେଳେ ପ୍ରଥମେ ଜଣେ ସୁରକ୍ଷା କର୍ମୀ ୪ ରାଉଣ୍ଡ ବ୍ଲାଂଙ୍କ ଫାୟାରିଂ କରିଥିଲେ । ପରେ ଅନ୍ୟ ଜଣେ ସୁରକ୍ଷା କର୍ମୀ ତିନି ରାଉଣ୍ଡ ବ୍ଲାଂଙ୍କ ଫାୟାରିଂ କରିଥିଲେ । ପୁରୀ ବାଲିସାହି ତେଲିପଡିଆରେ ଏହି କାର୍ଯ୍ୟକ୍ରମର ଆୟୋଜନ କରାଯାଇଥିଲା । ତେବେ ଏହି ଦୃଶ୍ୟ ଗଣେଷ ପୂଜା ମେଲୋଡ଼ି କିମ୍ବା ଅନ୍ୟ କୌଣସି ସାଂସ୍କୃତିକ କାର୍ଯ୍ୟକ୍ରମର ତାହା ସ୍ପଷ୍ଟ ହୋଇନି ।
ଏ ସମ୍ପର୍କରେ ଗଣମାଧ୍ୟମ ପ୍ରତିନିଧି ମାନଙ୍କ ବିଭିନ୍ନ ପ୍ରଶ୍ନର ଉତର ରଖି ଜିଲ୍ଲା ଆରକ୍ଷୀ ଅଧିକ୍ଷକ ଡଃ. ଉମାଶଙ୍କର ଦାଶ କହିଛନ୍ତି ଯେ, ପୋଲିସ ପକ୍ଷରୁ ଏନେଇ ଅଧିକ ତଦନ୍ତ ଜାରୀ ରହିଛି । ଘଟଣା କେଉଁ ଦିନର, କେଉଁଠି ଘଟିଛି ଏବଂ କେଉଁମାନେ ଏଥିରେ ସମ୍ପୃକ୍ତ ଅଛନ୍ତି ପୋଲିସ ପକ୍ଷରୁ ସେନେଇ ଛାନଭିନ୍ ଜାରୀ ରହିଛି । ତଦନ୍ତ ପରେ ଏନେଇ ଅଧିକ ତଥ୍ୟ ପୋଲିସକୁ ମିଳିପାରିବ ।
