ଭାଇର ଚାପୁଡା ମାଡରେ ଭଉଣୀ ମୃତ-ଭାଇଙ୍କୁ କୋର୍ଟ ଚାଳାଣ-୪ ଜଣକୁ ପଚାରାଉଚୁରା
ନୂଆପଡ଼ା, ୧୮ ଅପ୍ରେଲ – ନୂଆପଡା ଜିଲ୍ଲା ଖଡିଆଳ ବ୍ଲକ ନେହେନା ଗ୍ରାମରେ ଭାଇର ଚାପୁଡା ମାଡରେ ଭଉଣୀର ମୃତ୍ୟୁ ଘଟଣାରେ ଖଡିଆଳ ପୋଲିସ ଭାଇଙ୍କୁ ଗିରଫ କରି କୋର୍ଟ ଚାଲାଣ କରିଥିବା ବେଳେ ଗ୍ରାମର ୪ ଜଣକୁ ଅଟକ ରଖି ପଚରାଉଚୁରା କରୁଥିବା ଜଣାପଡିଛି ।
ସୂଚନାମତେ ନେହେନା ଗ୍ରାମରେ ଗତ ୧୩ ତାରିଖରେ ରାମ ନବମୀ ସାଙ୍ଗକୁ ଶ୍ରୀକୃଷ୍ଣଙ୍କ ନାମଯଜ୍ଞ ଅନୁଷ୍ଠିତ ହୋଇଥିଲା । ଏହି ନାମଯଜ୍ଞ ଦେଖିବା ପାଇଁ ମୃତ ଅଙ୍କିତା ଦଣ୍ଡସେନା ଭାଇ ମୁଚୁକୁନ୍ଦୁ ଦଣ୍ଡସେନାକୁ କହିଥିଲା । କିନ୍ତୁ ଭାଇ ମନା କରିବା ସତ୍ୱେ ଭଉଣୀ ଅଙ୍କିତା ଜିଦ ଧରିବାରୁ ଭାଇ ମୁଚୁକୁନ୍ଦୁ ଏକ ଚାପୁଡା ମାରିଥିଲା । ଚାପୁଡା ମାଡରେ ଅଙ୍କିତା ତଳେ ପଡିଯାଇ ମୃତ୍ୟୁ ହୋଇ ଯାଇଥିଲା । କିନ୍ତୁ ମୃତ୍ୟୁ ପରେ ପରିବାର ଓ ସମ୍ପର୍କୀୟ ଲୋକେ ପୋଲିସକୁ ନଜଣାଇ ଦାହ କରି ଦେଇଥିଲେ । ଏକଥା ନେହେନା ଗ୍ରାମସାରା ପ୍ରଚାର ହେବାପରେ ଗ୍ରାମର ଗଣେଷ ରାମ ବାଗ ଖଡିଆଳ ଥାନାରେ ଲିଖିତ ଅଭିଯୋଗ କରିିଥିଲେ ।
ଏହା ପରେ ପୋଲିସ ଘଟଣା ସ୍ଥଳରେ ପହଂଚି ମୃତ ଅଙ୍କିତାଙ୍କ ହାଡ ଓ ପାଉଁଶକୁ ଜବତ କରିବା ସହିତ ମାଡ ମାରିଥିବା ଭାଇ ମୁଚୁକୁନ୍ଦୁ ଦଣ୍ଡସେନାକୁ ଗିରଫ କରି କୋର୍ଟ ଚାଳାଣ କରିବା ସହିତ ଅନ୍ୟ ୪ ଜଣଙ୍କୁ ଖଡିଆଳ ଥାନାରେ ଅଟକ ରଖି ପଚାରା ଉଚୁରା କରୁଥିବା ଖଡିଆଳ ଥାନାଧିକାରୀ କୈଳାସ ଚନ୍ଦ୍ର ସେଠୀ ପ୍ରକାଶ କରିଛନ୍ତି ।
