ବସ୍ ରେ ନାବାଳିକାଙ୍କୁ ଦୁଷ୍କର୍ମ
ଅଭିଯୁକ୍ତ ହେଲପର୍ ଗିରଫ
ପୁରୀ, ୯ ଜୁଲାଇ – ପୁରୀରେ ବସ୍ ଭିତରେ ଜଣେ ୧୬ ବର୍ଷିୟା ଆଦିବାସୀ ନାବାଳିକାଙ୍କୁ ବସ୍ ହେଲପର୍ ଦୁଷ୍କର୍ମ କରିଥିବା ଘଟଣାରେ ଶିଶୁ ସୁରକ୍ଷା ଓ ଯୌନ ନିରୋଧ (ପୋକ୍ସୋ) ଆଇନ ବଳରେ ଏକ ମାମଲା ରୁଜୁ କରିଛି କୁମ୍ଭାରପଡ଼ା ଥାନା ପୋଲିସ । ଏଥିସହ ଘଟଣାରେ ସମ୍ପୃକ୍ତି ଅଭିଯୋଗରେ ଅଟକ ହେଲପରକୁ ଗିରଫ କରିଛି ।
ଗତକାଲି ରାତିରେ ଏକ ବସ୍ ଭିତରେ ସମ୍ପୃକ୍ତ ନାବାଳିକାଙ୍କୁ ଦୁଷ୍କର୍ମ କରାଯାଇଥିବା ନେଇ ଅଭିଯୋଗ ହୋଇଥିଲା । ଶରଧାବାଲିରେ ପୀଡ଼ିତା ନାବାଳିକା କାନ୍ଦୁଥିବା ଦେଖି ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ । କୁମ୍ଭାରପଡା ପୋଲିସ ଘଟଣାସ୍ଥଳରେ ପହଂଚି ପୀଡ଼ିତାଙ୍କୁ ଉଦ୍ଧାର କରିବା ସହ ତାଙ୍କ ଅଭିଯୋଗ କ୍ରମେ ବସ୍ ହେଲପର୍ ନାରାୟଣ ମଲ୍ଲିକକୁ ଅଟକ ରଖିଥିଲା । ତଦନ୍ତରୁ ଅଭିଯୁକ୍ତର ସମ୍ପୃକ୍ତି ଥିବା ଜାଣିପାରି ପୋଲିସ ତାକୁ ଗିରଫ କରି କୋର୍ଟଚାଲାଣ କରିଛି ।
ପୀଡ଼ିତାଙ୍କ ଘର କେନ୍ଦୁଝର ଜିଲ୍ଲାରେ । ସେ କୋଣାର୍କ ୱାଟର ପାର୍କରେ କାମ କରନ୍ତି । ଗତ ୨୯ ତାରିଖ ଦିନ ନାବାଳିକା ଜଣକ ଗାଁକୁ ଯାଇଥିଲେ । ଗତକାଲି ଗାଁରୁ ଫେରୁଥିଲେ । ସଂନ୍ଧ୍ୟାରେ ସେ କଟକରୁ ‘ତୁଷାର ତାଜ୍’ ନାମକ ଏକ ଏସି ଡିଲକ୍ସ ବସ୍ ଯୋଗେ ପୁରୀ ଆସୁଥିବା ବେଳେ ନିଦ ଲାଗିଯିବାରୁ ମାଳତୀପାଟପୁରରେ ଓହ୍ଲାଇ ପାରିନଥିଲେ । ପୁରୀ ବସଷ୍ଟାଣ୍ଡରେ ନିଦ ଭାଙ୍ଗିବା ବେଳକୁ ରାତି ପ୍ରାୟ ୯ଟା ହୋଇଯାଇଥିଲା । ହେଲପର୍ ନାରାୟଣ ତାଙ୍କୁ ବୁଝାସୁଝା କରି ବସ୍ ରେ ଶୋଇପଡିବାକୁ କହିଥିଲା । ଏହାପରେ ନାବାଳିକାଙ୍କ ସରଳତାର ସୁଯୋଗ ନେଇ ତାଙ୍କୁ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ପୀଡ଼ିତାଙ୍କ ଅଭିଯୋଗକୁ ଭିତି କରି କୁମ୍ଭାରପଡ଼ା ଥାନା ପୋଲିସ ଏ ସଂକ୍ରାନ୍ତରେ ୧୩୭/୧୯ ରେ ଭାରତୀୟ ପିଙ୍ଗଳ କୋଡ୍ର ଦଫା ୩୭୬/ (୪) ପୋକ୍ସୋ ଆଇନ ବଳରେ ଏକ ମାମଲା ରୁଜୁ କରିଛି ।
ତେବେ ରଥଯାତ୍ରାରେ ପୋଲିସର କଡ଼ା ସୁରକ୍ଷା ବ୍ୟବସ୍ଥା ସତ୍ୱେ ପୁରୀ ବସଷ୍ଟାଣ୍ଡରେ ନାବାଳିକା ଜଣକ ଏଭଳି ପାଶବିକ ଅତ୍ୟାଚାରର ଶିକାର ହେବା ପୋଲିସର କାର୍ଯ୍ୟଦକ୍ଷତା ଉପରେ ଅଙ୍ଗୁଳି ନିର୍ଦ୍ଦେଶ କରୁଛି । ଅନ୍ୟପକ୍ଷରେ ସେ ନାବାଳିକା ତଥା ପ୍ରାପ୍ତ ବୟସ୍କା ହୋଇନଥିବା ଜାଣି ସୁଦ୍ଧା ପୁରୀ ୱାଟର ପାର୍କରେ ତାଙ୍କୁ କିପରି କାମ ଦିଆଯାଇଥିଲା ତାହା ମଧ୍ୟ ତଦନ୍ତ ସାପେକ୍ଷ ।
