ଟ୍ରକ୍ ଧକ୍କାରେ ପରିବା ବିକାଳୀଙ୍କ ମୃତ୍ୟୁ, ଜଣେ ଗୁରୁତର
ବାଲେଶ୍ୱର, ୯ ଅଗଷ୍ଟ – ବାଲେଶ୍ୱର ଜିଲ୍ଲା ୬୦ ନଂ ଜାତୀୟ ରାଜପଥର ସାହୁପଡ଼ା ନିକଟରେ ଦୁଇ ପରିବା ବିକାଳୀଙ୍କ ଉପରେ ଟ୍ରକ୍ ଚଢ଼ିଯିବା ଫଳରେ ସେମାନଙ୍କ ମଧ୍ୟରୁ ଜଣକର ମୃତ୍ୟୁ ଘଟିଥିବା ବେଳେ ଆଉ ଜଣେ ଗୁରୁତର ଅଛନ୍ତି । ମୃତକଙ୍କ ନାମ ସୁରେନ୍ଦ୍ର ଦାସ । ଗୁରୁତରଙ୍କ ନାମ ନିରଞ୍ଜନ ଗିରି ଏବଂ ଘର ରେମୁଣା ବ୍ଲକ ଅନ୍ତର୍ଗତ ଗଣ୍ଡରଦା ଗ୍ରାମରେ ବୋଲି ଜଣାପଡିଛି ।
ଆଜି ଭୋର୍ ପ୍ରାୟ ୪ଟା ସମୟରେ ସୁରେନ୍ଦ୍ର ଓ ନିରଞ୍ଜନ ଘରୁ ପରିବା ବସ୍ତା ଧରି ସାଇକେଲ୍ ଯୋଗେ ବାଲେଶ୍ୱରର ନୂଆବଜାରକୁ ବିକ୍ରୀ କରିବାକୁ ଯାଉଥିଲେ । ଏହି ସମୟରେ ସାହୁପଡ଼ା ନିକଟରେ ପଛରୁ ଆସୁଥିବା ଏକ ଟ୍ରକ୍ ସେମାନଙ୍କୁ ଧକ୍କା ଦେଇ ଚାଲି ଯାଇଥିଲା । ଫଳରେ ଘଟଣାସ୍ଥଳରେ ସୁରେନ୍ଦ୍ରଙ୍କ ମୃତ୍ୟୁ ଘଟିଥିଲା । ନିରଞ୍ଜନଙ୍କୁ ଗୁରୁତର ଅବସ୍ଥାରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି କରାଯାଇଛି । ତାଙ୍କ ସ୍ୱସ୍ଥ୍ୟାବସ୍ଥା ଉଦବେଗଜନକ ରହିଛି । ପୋଲିସ ଘଟଣାସ୍ଥଳରେ ପହଂଚି ତଦନ୍ତ ଚଳାଇଛି ।
