କେନ୍ଦୁପତ୍ର ଗୋଦାମ ଜାଳିଦେଲେ
ନବରଙ୍ଗପୁର, ୩୧ ମଇ – ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ବ୍ଲକ ଦେଓବନ୍ଧ ସ୍ଥିତ ଜଙ୍ଗଲ ବିଭାଗର କେନ୍ଦୁପତ୍ର ଗୋଦାମ ପୋଡି ଯାଇଛି । ତେବେ ସେଠାରେ କେତେ କେନ୍ଦୁପତ୍ର ପୋଡିଛି, ବନ ବିଭାଗ ପକ୍ଷରୁ ଅଦ୍ୟାବଧି ତା’ର ଆକଳନ କରାଯାଇନାହିଁ । ଏପରିକି ଏନେଇ ଥାନାରେ କୌଣସି ଲିଖିତ ଅଭିଯୋଗ ହୋଇନାହିଁ ।
ଗତକାଲି ବିଳମ୍ବିତ ରାତିରେ ୧୫ରୁ ୨୦ ଜଣ ସଶସ୍ତ୍ର ଦୁର୍ବୃତ ଆସି କେନ୍ଦୁପତ୍ର ଗୋଦାମରେ ରହୁଥିବା କର୍ମଚାରୀଙ୍କୁ ଡାକିଥିଲେ । କବାଟ ଫିଟାଇବାକୁ କହିଥିଲେ । ସେମାନେ କବାଟ ଖୋଲିବା କ୍ଷଣି ଦୁର୍ବୃତ ମାନେ ସେମାନଙ୍କୁ ମାରଣାସ୍ତ୍ର ଦେଖାଇ କେନ୍ଦୁପତ୍ର କେଉଁଠି ଅଛି ବୋଲି ପଚାରିଥିଲେ । ପରେ ସମସ୍ତ ବନ କର୍ମଚାରୀଙ୍କୁ ଗୋଦାମରୁ ବାହାରକୁ ବାହାରି ଆସିବାକୁ ନିର୍ଦ୍ଦେଶ ଦେବା ସହିତ ସେମାନେ ଗୋଦାମରେ ନିଆଁ ଲଗାଇ ଦେଇଥିଲେ । ଏନେଇ ଥାନାରେ କୌଣସି ଲିଖିତ ଅଭିଯୋଗ ହୋଇନଥିଲେ ମଧ୍ୟ ପୋଲିସର ଖୋଳତାଡ଼ ଜାରି ରହିଛି । ଏଥିରେ ନକ୍ସଲଙ୍କ ହାତ ଥାଇପାରେ ବୋଲି ପୋଲିସ ଅନୁମାନ କରୁଛି ।
